Muttafarrikaat

Posted Mar 7th, 2007 at 10:51 AM by Amal

I am going to put in this space all the different, off-the-cuff aashaar that I write for Bait Bazi personal edition or else where. Not too good, but it's good to keep them safe in one place as they are neither part of any of my ghazals nor part of my regular record. This note will keep updating :~)

------------------------------

Chaand nikley ga to phir sey aey bicharrney waaley
hum sey poochey ga tujhey dhoond kar laey ke nahi!
din ke charrhtey hi kaheiN ge sab zamaaney waaley
chiraagh dard ke tum ney ab tak bujhaey ke nahi!

By: Amal

------------------------------

Farhat Abbas Shah sahab sey nehaet muaazrat ke saath, unki 'zameen' ka aek ghustakhaana istimaal hamaari taraf sey bhi:
------------------------------------------------------

Har gharri rehti hey gulshan meiN ik veeraani si
mehakney lagta hey yaadoN ka chaman shaam ke baad
yuN to so zakhm hum seeney meiN leeye phirtey heiN
jaaney kis ghaao meiN hoti hey chubhan shaam ke baad

By: Amal

------------------------------

Lamha khushi ka ho ya gharri dil dukhaaney ki
usey har baat pe aadat thi muskuraaney ki
morr judaai ka aaya to toot ke roney laga
hum ney koshish to bohat ki usey samjhaney ki

By: Amal

------------------------------

Yaas ho ke aas ho ke janm-o-janam ki piyaas ho
khud kisi ke qareeb ho ya koi dil ke paas ho
kya duwaeiN maangni taqeer sey haalaat ki
agar kisi ko kushi ka koi lamha na raas ho

By: Amal

------------------------------

Ye sochtey huwey so gaya ik bhooka be'chaara
chand dinoN ke faaqoN sey koi marta nahi hey!

By: Amal

------------------------------

Naam aatey hi tera hoNtoN par
phool khiltey heiN lafz ban, ban kar

By: Amal

------------------------------

Na chahatey huwey bhi chorr kar aana parra usey
wo imtihaan meiN na aatey huwey sawaaloN ki tarha tha

By: Amal

------------------------------

Raat ki baat na karna ke kesi kat'ti hey
shaam ki baat bhi chorro ke kesey dhalti hey
jis ko aana tha aakhir wo reh gaya hey kahaN!
ummeed ho ke pareyshaan haath malti hey

By: Amal

------------------------------

Yaad bhi kesa ajeeb marham hey
aur bhi zakhm kureyd deta hey

By: Amal

------------------------------

YaadoN ki kisi bhi gatthri meiN merey khaab chupa kar mat rakhna
in piyaari piyaari aaNkhoN ko saari raat jagaa kar mat rakhna
meiN taara hooN aawaar sa jaaney kis chatt par ruk jaaooN
tum meri khaatir raahoN meiN koi deep jalaa kar mat rakhna

By: Amal

------------------------------

Likh likh ke tera naam hum aaNkhoN sey falak par
taaroN sey sajaatey heiN harfoN ko saari raat

By: Amal

------------------------------

Ye wisaal hey ke kamaal hey meri khuwaahishoN ke hajoom ka
meiN jis taraf bhi nazar karooN mujhey har taraf wo dikhaai dey
meiN hisaab judaai ka maang to looN wo aaey jab par dar ye hey
jaaney kis tarha wo miley mujhey jaaney kis tarah wo safaai dey

By: Amal

------------------------------

Yaas ke barrey samandar meiN ik aas ki kashti chotti si
toofaaN ki taaqat andha-dhund aur meri hasti choti si
baadal ke biphrey toloN ko koi kesey jaa ke samjhaaey
is baarish meiN kaheiN beh na jae meri basti chotti si

By: Amal

------------------------------

Nigaah ney jhuk to jaana hey magar us sey zara pehley
hameiN itna bataa dena hamaarey saath to aao ge!
barri chahat sey aaNkhoN meiN tumharey naam ke sapney
sajaa ke rakheiN ge har shab, tum kisi raat to aao ge

By: Amal

------------------------------

Na-samajh hey ye dil ab kon is ko samjhaaey
jo likha taqdeer meiN hey kon usko jhutlaaey
bat ke reh gai heiN soch ki jaageereiN kiuNke
na usey saath meiN rakha na door kar paaey

By: Amal

Posted in Uncategorized

Views 156 Comments 1

« Prev Main Next »

Total Comments 1