Assalamu alaykum!
Here is a masterpiece of Urdu poetry.A naat by the best naatiyya poet in Urdu..Ala Hazrat. Please enjoy it!

It is from the first volume of Ala Hazrat's divaan, 'Hadaaiq-e-Bakhshish'...

786

1. Kis ke jalway ki jhalak hai, yeh ujaala kya hai//Har taraf ka hairatzada takta kya hai

2. Maang man maanti, munh maangi muraadein lay ga//na yahaan 'na'hai, na mangtaa se yeh kehna 'kya hai?'

3. PinD kaDvee lagay naasih, na tarsh ho ay nafs//zehr-e-'asyaan mein sitamgar tujhe meeTha kya hai

4. Hum hain unkay, woh hain Tere, to huwe hum Tere//Is se baDh kar teri simt aur waseela kya hai!

5. Unki ummat mein banaaya, unhein Rahmat bheja//yunh na farma ke tera rahm mein da'wah kya hai

6. Sadqay pyaare ki hayaa ka ke na lay mujh se hisaab//bakhsh bay pooche, lajaaye ko lajaana kya hai!

7. Zaahid unka mein gunahgaar woh mere Shaafa'//Itni nisbat mujhe kya kam hai, tu samajha kya hai!
8. Bay basee ho mujhe jab pursish-e-amaal ke waqt//dosto kya kahoon us waqt tammana kya hai

9. Kaash faryaad meri sunkay ye farmaayein Huzoor//'Haan koi dekho ye kya shor hai, ghoghaa kya hai'

10. 'Kaun aafatzada hai hai, kis pe balaa TooTi hai?// Kis museebat mein giraftaar hai, sadma kya hai?'

11. 'Kis se kehta hai ke "lillah! khabr lejiyay meri!"// kyon hai betaab, yeh baychainee ka rona kya hai?'

12. 'Iss ki baychainee se hai khaatir-e-aqdas pe milaal// bay kasee kaisee hai, poocho koi guzra kya hai?'

13. Yoon malaik karein ma'rooz ke 'ik mujrim hai// iss se pursish hai, "bataa tu ne kya kya kiya hai?"'

14. 'Saamna qahr ka hai, daftar 'amaal ke hain pesh//Dar raha hai ke Khuda hukm sunaata kya hai'

15. 'Aap se karta hai faryaad ke "Yaa Shah-e-Rusul// Banda baykas hai, Shahaa rahm mein waqfa kya hai?"'

16. Ab koi dam mein giraftaar-e-balaa hota hoon//aap aajaien to kya khawf hai, khaTka kya hai

17. Sunke ye arz meri Bahr-e-Karam josh mein aaye// yoon malaik ko ho irshaad "Thernaa kya hai?"

18. "Kis ko tum mawrud-e-aafaat kiya chaahite ho?// hum bhi to zara aakar dekhien, tamaasha kya hai!"

19. Inki aawaaz pe kar UThoon mein baysaakhta shor//aur taDap kar yeh kahoon 'ab mujhe parwaa kya hai!'

20. 'lau, woh aaya mera haami, mera gham khwaar-i-umam//aagayee jaan, tan-e-bay jaan mein, yeh aana kya hai!'

21. phir mujhe daaman-e-aqdas mein chhupaalein Sarwar// Aur farmaayein "haTo, is pe taqaaza kya hai?"

22. ChoD kar mujhko farishtay kehein 'mahkoom hain hum//hukm-e-waala ki na ta'ameel ho, zuhra kya hai?!'

23. Yeh samaan dekh kay mahshar mein uThay shor ke 'wah!//apnay banday ko museebat say bachaaya kya hai!'

24. Ay Raza jaan-e-anaadil tere naghmon pe nisaar//bulbul-e-baagh-e-Madina tera kehna kya hai!

******************************

I hope you enjoyed it! Do dua for Ala Hazrat's rooh mubaarak and for me too using this naat as a waseela!

If you like it, please get the Imam's divaan.

khuda haafiz!

Asif

[This message has been edited by Asif (edited March 22, 1999).]